#هند_يوسف تكتب: مضغوطة

كتب بواسطة: هند يوسف في . القسم انسانيات

 

 

مضغوطة علشان عندها مذاكره و امتحانات ..

مضغوطة علشان بتشتغل دلوقتى بعد ما خلصت الجامعة ..

مضغوطة علشان اتجوزت و مسئولية البيت مع الشغل كبيره عليها ..

مضغوطة حتى و هى مش بتشتغل و قاعده فى البيت .. "متفتكروش ان إللى قاعده فى البيت فاضية و رايقه و محدش ادها بالعكس ممكن تكون بتلف حوالين نفسها ال ٢٤ ساعة اكتر من إللى بتشتغل" !!!!

مضغوطة علشان خلفت و بقت أم و مسئولة عن طفل ولا طفلين ، و زوجة و مسئولة عن زوج و بيت ، و يمكن كمان تكون بتشتغل ..

مضغوطة حتى لو معندهاش أولاد و مبتشتغلش و مش متجوزة و مش وراها حاجة و حتى لو عايشة فى ال لالا لاند كمان !!!!

اه هتفضلى مضغوطة و ده الطبيعى اى كان ظروفك ايه .. هى دوامة و بيعيشها كل الناس مش انتى بس ..

بس ممكن اوى تكونى بتعملى كل ده و اعصابك حديد و بدل ما تكونى مضغوطة تكونى مبسوطة مثلا ..

سمعت كلمه النهارده اد ايه هى مريحة "السلام الداخلى" ..

جربى تغمضى عينك و تقوليها بجد هترتاحى ، فهمت اد ايه ان السلام الداخلى ده لازم يكون من جواكى انتى ..

انتى إللى هتريحى او هتتعبى نفسك ..

انتى إللى هتقررى لما تبصى فى المرايه هتحبى نفسك و لا هتودى وشك الناحية التانيه ..

اه هو سلام داخلى يعنى من جواكى انتى .. انتى و بس .. انتى إللى هتقررى .. انتى إللى هتختارى .. انتى إللى هتحكمى على حياتك عايزة تعيشيها ازاي ..

بلاش الزحمة لحاجات كتير فاكراها هتفيدك و فى الآخر هتكون النتيجة العكس تماما ..

بتحسسى نفسك ان فيه حاجات لازم لازم لازم تعمليها مع انه فى الآخر اختيار مش إجبار ..

ظبطى جدول يومك و لو حاسه ان فيه حاجة تقدرى تستغنى عنها فورا شيليها من جدولك و حطى مكانها حاجة انتى عارفه انها هتبسطك ..

أعملى حاجة لنفسك انتى و بس علشان يروح احساس انك الضحية و الشمعة إللى بتحترق من أجل الآخرين و هتتحرقى انتى معاها فى النص ..

خير الأمور الوسط فى كل حاجة ..

متخليش روتين يومك و طريقة حياتك إللى سهل اوى انها تتغير تحرمك من انك تعيشى فى هدوء و تحسى السلام الداخلى إللى بيه هتعملى كل حاجة فى حياتك وانتى مبسوطة مش مضغوطة ..

عارفه ان الكلام مفيش أسهل منه و ان الواقع بيكون مختلف بس حياتنا هنعيشها مره واحده و بس و اكيد تستاهل اننا نفكر تاني الف مره ..

#اختيار_مش_إجبار
#هنعيش_مره_واحده_وبس
#السلام_الداخلى

هند_يوسف