#هند_يوسف تكتب: خلى الحلو يكمل

كتب بواسطة: هند يوسف في . القسم انسانيات

 

الحلو اللي جواك دايما هو الغالب بس برضه في ناس ممكن تطلع اوحش ما فيك ..

الواحد يقدر يحكم عقله كويس بس ساعات قلبك هو اللي يكسب وبتمشي وراه من غير ما تحس ..

الشخص الطيب المتسامح مش معناه انه عبيط و بيضحك عليه ; هو بس بيعدي بمزاجه لكن لو كبرت في دماغه مش هتسلك معاه ..

الناس اللي دايما متفائله و بتضحك طول الوقت عادي في مشاكل في حياتهم و بتعدي عليهم ايام صعبه، و برده بيضحكوا فمتحكمش من الظاهر ..

الناس بقي اللي دايما شايلين الهم و مكشرين مش لازم تحكم عليهم بانهم ناس نكديه و كئيبه، علشان الله اعلم بظروفهم و يمكن لو كنت مكانهم كنت هتبقي نكدي اكتر منهم..

متسمعش من طرف واحد، علشان لما تسمع من الطرف التاني هتعرف ان الطرف الاول كان بيشتغلك، و كل واحد فيهم بيحط التاتش بتاعه..

طبيعي لما كنا بنسمع ان محدش هيحبلك الخير اكتر من نفسه بس في زمنا ده محدش هيحبلك الخير اصلا ..

لما بتعامل مع حد عنده ضمير في كل حاجه و بشوش كده، و فيه صفات كويسه باستغرب اوي ومبصدقش مع ان ده المفروض اللي يكون طبيعي و عكس كده هو اللي نستغرب منه ..

للاسف جه علينا الوقت اللي لو انت جدع هتبطل، علشان ببساطه لو حد وقفك في الشارع عايز مساعده مش هتبقي عارف هو فعلا محتاجلك و لا ده كمين و هتتثبت ..

كل يوم بنتعرف علي ناس جديده و الناس القديمه تقريبا بيتبخروا، اصل كل واحد مش فاضي يقابل حد ... يعني لو مش مجبر تشوفهم كل يوم بحكم الشغل و لا اي مناسبه تجمعكم، يبقي مش هتشوفهم بالسنين ... اه و الله زي مابقولكم كده.

اطلب من ربنا يعملك و يختارلك الخير، علشان هو بس الاعلم بالخير فين ... فالوسايط مش هتفيدك في حاجه، ممكن تجيب واسطه تشتغل في شركة كبيرة و تكون سبب في فشلك و تنجح في حاجة تانية في حته تانية خالص ... اسعي انت بس و توكل علي الله وهتتفاجئ من اختيار ربنا ليك ..

مش لازم رأيك يكون زي رأيي علشان احنا اتنين مش واحد ... ده حتي التوأم اللي اسمهم توأم مختلفين في كل حاجه ..

مش عيب انك تغلط العيب انك تكون من جواك عارف انك غلطان و تكابر ..

كلمة انا اسف مش كلمة صعبة و لا تقيلة ... انت اللي معقد الدنيا ... و بالنسبه للناس السويه دي كلمة مريحة للاعصاب اصلا ..

لو انت من الناس اللي عندها الحاسة السادسه فصدق احساسك و امشي وراه ...

ده حتي بيقولك لو فيه حاجه اختلف علي تفسيرها اتنين في الاخر استفتي قلبك ..

خليك دايما علي مبادئك علشان لو كل واحد هيغير مبادئه علشان يواكب الزمن يبقي الزمن يقف احسن ..

حلمك مش هيتحقق غير لما تكون بتعرف تجري وراه و تلحقه ..

فيه ناس لما بتفتكر ذكرياتها بتزعل حتي لو حلوة، علشان حاجه خلصت و عدت ... مع ان الذكريات الحلوة المفروض احنا اللي نفكر نفسنا بيها علشان نفرح ... اومال تبقي حلوه ازاي ..

حط شوية حاجات بتحبها في جدول يومك و صمم انك تعملها ... و شوية حاجات تانية مش بتحبها صمم انك تشيلها من جدول يومك و من حياتك اصلا.

و افتكر ان كل ما تفضي حاجة وحشه هتلاقي مكان تحط الحلو.

هند يوسف