#هالة_القاضى تكتب: ساعات مش وردية

كتب بواسطة: هالة القاضى في . القسم انسانيات

 

ساعات الواحد بيكون عنده حرية اتخاذ قرارات ممكن تغير مجرى الحياة معاه ..

و ساعات بتكون القرارات دي اجبارية، و ساعات ... سبحان الله ... القدر هو الي بيوجهنا بدون اي تدخل منا.

و في كل الحالات بيكون ده الخير بتاعنا مهما حاولنا نهرب او نتذاكى على اقدارنا.

 

ساعات بنكون مرتبين لحايتنا محطات كتيرة  رسمناها في خيالنا بصورة وردية ... و هوووووب ييجي الواقع الاليم و يقولنا طريقك مسدود مسدود يا ولدي ... بس برضه، وبالرغم من ده كلة، بيكون دة الخير بتاعنا ... بس للاسف بصائرنا بتكون محدودة الاداراك في اللحظة دية، وبعد فترة من الزمن بنعرف الحكمة من كل مطبات حياتنا الي فاتت.

 

 ساعات بنحس بالوحدة رغم وجود الاهل و الاصدقاء و المعارف و الاولاد ... لكن مش بنحس بسندتهم لينا وقت ازماتنا، و مهما يرجع الزمن بينا اللحظات دي عمرها ما بتتمحي من الذاكرة، علشاااان لحظاااات الوحدة دي صعبة اوي، بس برضه بتعدي و الدنيا بتمشي و مش بيتبقى منها الا ذكرى قابلة للنسيان مع الوقت.

 

 ساعات كتير ناس بتعلم علينا رغم نوايانا السليمة و طيبتنا الزايدة، و بيسببولنا الم نفسي صعب و جرح عامل زي الحرق كدة، بيروح لكن اثرة مازال باقي .. و رغم بشاعة الناس دي الا انهم بيكونوا لينا درس نتعلم منه ازاي نبقى اقوى و ازاي نعرف نتعايش مع الدنيا الجديدة.

 

الحياة مش شىء وردي ..

و الدنيا مش جنة ..

لكن كل املي اننا نخرج منها على خير، رغم مطباتها الكتيييييرررر اوي اوي اوي ... و اننا نفضل بفطرتنا ونحافظ على جزء من براءة طفولتنا، و اننا نعي الهدف من وجودنا في الدنيا و نسعى له قبل ان يأتي يوم لا ينفع فية مال و لا بنون الا من اتى الله بقلب سليم ...

و دمتم طيبين

هالة القاضى