#هند_يوسف تكتب: ناس نعمة

كتب بواسطة: هند يوسف في . القسم انسانيات

 

فيه ناس كده يتعدوا على صوابع الإيد و مش موجودين كتير ... و يمكن كمان يبقى حظك وحش و ماتقابلهمش فى حياتك اصلا ..

ناس دايما فاكرهم حتى لو مش موجودين معاك ..

ناس و انت بتتكلم معاهم تلاقى نفسك مرتاح ..

ناس و انت بتبين مشاعرك ليهم من كتر جمالهم بتلاقى دموعك بتنزل لوحدها ومن غير سبب ..

ناس دايما موجوده فى الوقت المناسب و تحس ان ربنا باعتهم علشان يكونوا جنبك فى وقت فعلا انت محتاج متكونش لوحدك ..

ناس دايما بتطلع الحلو اللى جواك فى وقت أصلا الحلو فيه بقى قليل و لو موجود بيكون مايع ..

ناس من أبسط حاجة بيعملوها بتبقى عندك حاجة كبيرة، و يمكن كمان كل حاجة ... علشان برده احنا فى وقت مبقاش فيه حد فاضى يعمل لحد حاجة تفرحه حتى لو بسيطة ..

ناس كل حاجة بيعملوها حقيقة بجد مشاعرهم ، كلامهم ، وقفتهم جانبك ، ضحكتهم ، كل حاجة حقيقة علشان من قلبهم ..

ناس لما تشوفهم تبقى مبسوط ، لما تليفونك يرن و تلاقى رقمهم تبقى عارف ان بعد مكالمتهم يومك و مودك و كل حاجة هتتغير ..

ناس لما تفتكرهم تلاقى وشك بيضحك لوحده ..

ناس مالهمش كلمه واحده ممكن توصفهم هما كده نعمه من عند ربنا.

ناس هما اكيد عارفين نفسهم كويس

#ناس_نعمه

هند يوسف