#هند_يوسف تكتب: الحكم بعد المداولة

كتب بواسطة: هند يوسف في . القسم انسانيات

 

هى مالها كل يوم الصبح تدخل علينا استغفر الله العظيم يارب مركبالنا الوش الخشب ؟؟؟ دى حتى يا اخى مبتضحكش فى وش اى حد !!!!!

اصل مامتها محجوزة فى المستشفى و تعبانه جدا و أكيد هى قلقانه عليها ...

 

هو الولد ده ماله بيزن كده ليه وأهله مش قادرين يسكتوه ؟؟ يالا بينا من هنا ده جابلى صداع  يا جدع !!!!!

اصله عيان و لسه جايين من عند الدكتور و واخد ادويه ااااااد كده فأكيد غصب عنه بيزن ، ده الكبير مش بيستحمل ما بالك الصغير بقى ...

 

هى مالها لبسالنا اسود فى اسود كده يا ساتر يارب ؟؟ ما الالوان كتير ولا هى ماشيه بمبدأ إن الاسود شياكة و الاسود يليق بك و الجو ده !!!!!

اصل كان عندها حاله وفاة فى العيلة و كان حد غالى عليها ...

 

هو ماله رغاى كده ياعم ده مابيفصلش، تقعد معاه شويه يحكيلك قصة حياته من عشر سنين !!!!!

اصله عايش لوحده بعد ما مراته ماتت وولاده اتجوزوا و مش لاقى حد يتكلم معاه ...

 

هى مالها تخنت اوى كده ليه ده بقى شكلها صعب اوى ؟!!!!!

اصلها بتاخد ادويه فيها كورتيزون و هى اللى عامله فيها كده ...

 

هو ليه خرج ولاده من المدرسة دى و راحوا مدرسة تانيه مع ان الاولانيه كانت احسن بكتير ؟!!!!!

ده على عينه انه يعمل كده ، اصل الشركة اللى كان بيشتغل فيها قفلت و المدرسه دى على اد امكانياته ...

 

هى ليه ماتجوزتش لغايه دلوقتى مع ان اتقدملها ناس كتير ؟؟ شكلها معقدة !!!!!

اصلها كانت مخطوبه لواحد و كانت بتحبه اوى و مات فى حادثة، و من بعدها و هى مش قادره تتقبل وجود حد تانى فى حياتها ...

 

هو الراجل ده واقف فى نص الشارع كدة ليه ؟؟ ده اكيد متخلف و مبيفهمش مش قادر يعنى يقف على جنب شويه !!!!!

اصل العربية عطلت منه و علشان كده واقف فى نص الشارع يعنى غصب عنه ...

 

الخلاصة ..

بلاش تتسرع و تحكم على حد من اللى بتشوفه فى الظاهر و بس ... علشان كل حاجه بتشوفها و كل تصرف بيحصل قدامك ممكن يكون وراه حكايه انت ماتعرفهاش، و لو عرفتها اكيد هتغير كلامك اللى قلته او على الاقل تفكر فى اعذار قبل ما تقول اى كلام و خلاص ..

الأحسن .... خلى الحكم بعد المداولة ..

هند يوسف