#هند_يوسف تكتب: كلام انهى طنط اللى هيمشى

كتب بواسطة: هند يوسف في . القسم انسانيات

 


هاتيهم ورا بعض أحسن علشان ترتاحى !!!!

اصبرى لما المحروس الصغير يبقى عنده أد خمس ست سبع سنين كده تكونى ارتاحتى شوية !!!!

أوعى تجيبى تانى هو كفايه واحد بس فى الزمن ده !!!!

هما الإخوات يعنى بيعملوا إيه لبعض دوول بقوا ذى قلتهم !!!!!

مفيش ست فى الدنيا متقلهاش جمله من إللى فوق دوول .. و مفيش برده ست فى الدنيا دماغها موجعتهاش من التفكير فى الموضوع ده .

تعالوا نشوف كل ست بتفكر إزاي على حسب هى فى مرحله إيه دلوقتى ..
إللى عندها طفل واحد و بتسأل نفسها هو انا المفروض أجيب أخ ولا أخت تانى للمحروس الأولانى امتى ؟؟

بتلاقيها بتفكر لو انا قررت إنى أجيبهم ورا بعض، زى رأى طنط عطيات فى الجملة الأولى، يعنى الفرق بينهم سنه ولا سنه و نص بالكتير ..يبقى كده هتخوضى مرحلة الأم إللى عندها توأم مع الفرق إنها كانت حامل و نفسها غامة عليها و بترجع و بتتوحم مره واحدة، لكن انتى مرتين .. يالا معلش اهو كله بيعدي دى كأنها شكة دبوس.

نيجى بقى للمهم ... هيجى عليكى وقت و الاتنين بيعيطوا فى نفس ذات اللحظة، أصلهم جعانين، و تبقى مش عارفه تعملى ايه تأكلى ده و لا ترضعى ده ..
الإتنين عمرهم ما بيناموا فى نفس الوقت طبعا ، فده ينام التانى يصحى و ده يصحى الأولانى ينام و طبعا مفيش حد بيستلم منك ورديات ... لأ انتى إللى سهرانه كل الورديات الصباحية والمسائية و إللى فى النص كمان، يعنى من الآخر كده انتى محكوم عليكى تكونى صاحيه ال ٢٤ ساعة مع الشغل و النفاذ ..
طبعا لازم طول الوقت تاخدى بالك من تصرفاتك، علشان الأولانى مايغيرش من التانى، و التانى لسه صغير مش فاهم، لغاية لما الإتنين يكونوا بيفهموا ... و ورينى شطارتك بقى هتعرفى تظبطيها إزاى، و لو انتى سوبر مامى و عرفتى تظبطيها يبقى لازم تكونى جاهزة لأدوية الضغط و السكر و الذى منه .

لما يكبروا شوية هتلاقيهم دايما بيتخانقوا و ماسكين فى شعور بعض، ولا كإنهم مولودين فوق روس بعض زى ما بيقولوا و دى الحقيقة .. و تبقى طول الوقت بتصرخى بس يا حبيبى .. اديهاله يلعب بيها شوية يا عمرى .. العبوا مع بعض و متتخانقوش يا قطاقيط .. انت شوية و هو شوية يا روح قلب مامى .. يا ختااااااااااااااااى !!

و كله كوم و لو الإتنين عيانين فى نفس الوقت كوم تانى !!!

بلاش اصدمك بقى بالمصاريف و اللبن و البامبرز و الأدوية و المدارس و ..... و ...... و ...... هسيبك تتصدمى لوحدك ..

 

كفايه كده ... هاااا قررتى تستنى شوية ولا تجبيهم ورا بعض أحسن ؟؟!!!

 

طب لو قررتى تستنى شوية ... أد خمس ست سبع سنين كده زى رأى طنط سوسن فى الجملة التانية سيكون الوضع كما يلى :

هتفضل دماغك بتودى و تروح و هتلاقيكى بتكلمى نفسك طول النهار ... هو انا بعد ما ارتاحت من السيريلاك و البيبى و الدينتينوكس و التيتينه و شوربة الخضار و الأعشاب علشان المغص و التطعيمات و سهر الليل و النهار هرجع أعيد نفس الفيلم ده تانى !!!!

أنا قلتلك أهو إللى هيحصل بس فى الآخر القرار قرارك وقلبى عندك و الله ..

نيجى بقى لآخر جمله لطنط باكينام و هو كفايه واحد بس فى الزمن ده !!!!

شوية و هتقولى عندها حق هما يعنى الإخوات بيعملوا ايه لبعض ... ده انا و اخواتى على طول متخانقين و الصغيرة بتغير منى و الكبيرة مفيش بينى و بينها عمار ... و أخويا الوسطانى ليل و نهار بره البيت و مبشوفهوش أصلا ..

و شوية و هتحسى بالذنب ... و هو كده هكون أنانية و مبفكرش غير فى نفسى و راحتى أنا و بس ؟ ما فيه إخوات كتير زى السمن والعسل مع بعض و دايما سند لبعض و سرهم و حكاويهم و ذكرياتهم و لعبهم مع بعض ..

يعنى لكل قاعدة شواذ و برده القرار قرارك و الله المستعان !!!

الموضوع فعلا محير و القرار فى كل حالة من الحالات دى فعلا بيكون صعب،، علشان كده الأحسن نسيبها على ربنا و دايما ندعى ان ربنا يعملنا الخير علشان هو وحده إللى يعلم الخير ليكى إيه ... و خليكى متأكده ان ربنا بيدى كل واحد على أد ما يقدر يستحمل ..

يعنى لو الخير ليكى و ربنا شايف إنك هتقدرى تربى اتنين الفرق بينهم سنه ولا اتنين بس يبقى ده إللى هيحصل و ربنا هيقدرك إن شاء الله ..

و لو مش هتقدرى و هتستنى شوية حلوين كده يبقى أكيد ده الخير ليكى ..

و لو قررتى إنه واحد بس كفايه يبقى أكيد ربنا عارف إن ده الأنسب لحياتك ..

سيبيها على ربنا و تأكدى إنه هيختارلك إللى فيه الخير ليكى ..

تقعدوا بالعافيه

هند يوسف