#هند_يوسف تكتب: "نام ع الجنب اللى يريحك"

كتب بواسطة: هند يوسف في . القسم انسانيات



بحب اوى الجملة دى بحس بيها بالحرية والراحة ..

بحس ان كل واحد لو عمل إللى يريحه فى حياته، بغض النظر عن رأي فلان و علان و الناس هتقول ايه والكلام الكبير ده، بجد هيكون مبسوط و مرتاح من جواه ..

عارفه ان مفيش حد فى الدنيا حياته مفيهاش مشاكل .. كلنا عندنا مشاكل .. وكلنا بنحتاج احيانا نفضفض مع حد و ناخد رأيه ..

ويا سلام لو كنت متضايق من حاجة او عندك مشكله معينه ولقيت اللى بتفضفض معاه مر بنفس المشكلة وعمال يوصف احساسك وكأنه انت اللى بتتكلم وبتحكى !!! بتحس ساعتها انك مش انت لوحدك اللى جراله كده .. وان فيه حد اتعرض لنفس الموقف وممكن اوى يساعدك تعمل ايه وتتصرف ازاى ..

بس تعمل ايه بقى لو رحت لواحد رأيه مش هيريحك ... أيوة ممكن يكون أتعرض لنفس الموقف بس مش بنفس التفاصيل فبالتالي الموقف واحد بس الظروف مختلفه !!

تعالوا نشوف شوية مواقف لناس بجد و بحق و حقيقى، علشان تعرف انه ماشى إنك تاخد رأى الناس اه ... لكن تعمل إللى يريحهم لأ .. خد رأى الناس وأعمل فى الآخر إللى يريحك إنت :)

أمثله من واقع الحياه :

مثال رقم ١ ..

• انتى ازاى قادرة تشتغلى وكمان تاخدى بالك من بيتك وولادك .. ده كتير عليكى وحرام عليكى نفسك .. هو فيه احلى من قاعدة البيت ؟!!

ممكن يكون الواحد بيزهق من قاعدة البيت ، وده ميمنعش انك لما تقررى انك تشتغلى انك بتبدلى الزهق بإنك تكونى مضغوطة شوية ، بس بالنسبالك فى الاخر انتى مبسوطة ..

بس اكيد بعد الجمله اللى اتقالتلك دى ممكن تقولى بينك وبين نفسك: ايه ده هو انا فكرت غلط ولا ايه ؟؟ طب انا صح ولا غلط ؟؟ .. وتضيع ثقتك فى اختيارك مع انه ممكن اوى يكون هو ده القرار الصح المناسب لحياتك ولظروفك ..

مثال رقم ٢ .. "مثال رقم ١ بس بالشقلوب"

• انتى ازاى قادرة تستحملى قاعدة البيت .. هو انتى مبتزهقيش ؟!!

نفس الكلام بس بالعكس ، ممكن اوى اللى قاعدة فى البيت تكون مستمتعة جدا بحياتها وقادرة تنظم وقتها، وجمله لطيفه زى اللى بتتقال دى تخليها تحس إن في حياتها حاجة ناقصة ويضيع جزء من راحتها النفسية والنظام اللى كانت ماشية عليه زى الساعة ..

مثال رقم ٣ ..

• انت ازاى قادر تروح المشوار ده كل يوم .. انت لازم تدور على شغل تانى يكون قريب من بيتك؟!!

مع ان حبك لشغلك ممكن يخليك تكون مش حاسس بهم المشوار ده .. بس ازاى هو الناس هتسيبك كده عايش حياتك فى هدوء من غير ما يحطوا التاتش بتاعهم !!!!

ومش بعيد تسمع للكلام ده وتروح فعلاً شغل تانى ويكون عشر دقايق من البيت، بس تبقى بتروح كل يوم وانت مش طايق نفسك لأى سبب من الاسباب .. مدير غلس .. ناس وصوليه .. جو عام مش مريح ومش لاقى نفسك فيه ..

مثال رقم ٤ ..

البنت إللى مش مرتاحة مع خطيبها بس طبعا مجبرة انها تكمل معاه علشان كلام الناس وهيقولوا ايه !!!

مثال رقم ٥ ..

البنت إللى فوق إللى عملت حساب لكلام الناس و اتجوزت خطيبها، إللى مكنتش مرتاحة معاه و دلوقتى برده مجبرة انها تكمل معاه حياه من غير طعم و لا لون .. حياه لونها بلاك و برده علشان كلام الناس و هيقولوا عليها ايه منفصله و لا مطلقه مثلا !!!

عادى مالها الحياه البلاك اهى كلها ألوان اهو احسن من كلام الناس !!!

مثال رقم ٦ ..

• تلاقى واحد بيشتغل فى مكان اى حد يتمناه وعلشان مشكلة او موقف مش عارف يتأقلم معاه او وضع مش مريح او مناسب بالنسباله .. فيقرر انه يسيبه !!!

فتلاقى بقى كلام الناس .. ده اكيد بيدلع !!! ... هو ازاى يعمل كده؟؟ .. هو حد لاقى شغل؟؟

لغايه ما تفضل فى مكانك وانت مش طايق نفسك لمجرد انك بتسمع لكلام الناس ..

مع العلم انك لو فضلت فى الشغل و سمعت كلام الناس هتلاقى غيرهم بيقولوا .. هو ايه إللى مصبره على كده ؟!! وماله خايب كده ليه ؟!! ما يروح يدور على شغل تانى طالما مش مرتاح !! 

و أمثله تانية كتييييييييييييير اوى لو فضلنا نسمعلها و نفكر فيها هنعيش حياتنا فى توتر و قلق دايما ..

يعنى من الآخر انت هتفضل تأجل القرارات الصح إللى المفروض تاخدها فى حياتك علشان الناس وفى الآخر الناس مبيعجبهاش العجب أصلا !!

الخلاصة بقى مالكش دعوى بكلام الناس ونام ع الجنب اللى يريحك .. شوف ايه المناسب ليك ولحياتك ولظروفك واعمله .. اهم حاجة انت .. انت اللى عارف نفسك .. وانت اللى عايش فى الموضوع من جوه .. وانت اللى عارف ايه اللى يريحك مش حد تانى .. ولو حد حب يتدخل فى حياتك ويقنعك انك غلط رد عليه بالمقولة الشهيره لإبراهيم سعفان وقوله :

"انا مبسوط كده .. انا مرتاح كده" ...

"شوف الجنب اللى يريحك ايه ونام عليه .. هتقوم من النوم فايق وزى الفل"

هند يوسف