#فادى_رمزى يكتب: روشتة حكم الشعب المصرى

كتب بواسطة: فادى رمزى في . القسم انسانيات

 

الشعب مصرى مطالبه مش كبيرة ... بيرضى بقليله اوى واقل حاجة تفرحه ومش طالب غير الستر على مختلف طبقاته ..

هو بس مش عايز يعانى فى كل مشوار وكل مصلحه يقضيها ... عايز ابسط مستوى للخدمة ممكن يلاقيه وهيرضى بيه.

يعنى مثلا هو مش رافض المرض، بس طالب ما يتهانش فى العلاج ..

ومش عايز يبقى مليونير بس عايز يغطى مصاريفه ...

ممكن يتمرمط فى الشغل بس يقبض اللى يكفيه ..

مش فارقه معاه الاهانة ... مع انها بتوجعه .. بس خد عليها وبيستحمل لجل ما يعيش ... مجرد يعيش ... حتى لو جنب الحيط. 

ممكن يقاسم رزقه مع مسئول فاسد بس يلاقى اللى يكفيه اخر اليوم ..

بيلجأ للفساد لأنه عايش فى بيئة فاسدة ... ده سلو بلدنا بسبب المنظومة نفسها مش بسبب شعبها.

انبساطه ممكن ييجى من قعدة حلوة واكله شهية من ابسط ما يمكن ..

ولما بيلاقي حد يحترمه بيشيله فوق راسه، وياسلام لو لقى حد فاهم احتياجاته ومطالبه البسيطة فى الحياة ... هتشوف تحضر ورقي فى التعامل وتفانى ودعم مش ممكن تتخيله ..

ولما يلاقي عدل فى اى اجراء بسيط يمسه ... على طول بيلتزم وبيراعى غيره وابتسامة جميلة بتملا وشه.

شعب عارف مين بيشتغله ومين بيستغله ومين قاصد مصلحته ..

جايز ما يظهرش ده بس هو فاقس الدنيا على الرغم من قلة تعليمه ولكن وعيه وذكاءه الفطرى بيسندوه دايما.

هو لم يجد فعلا من يجنو عليه ... وكل اللى قالوا انهم بيحنو عليه طلعوا بينهبوه ويستغلوه ..

لذلك بقى منتمى لنفسه ولمجتمعه بس ... لان البلد بالنسبة له مالهاش وجود ... ماشافش منها حاجة وعايزها تسيبه فى حاله ..

لكنه بيفرح لنجاحها، بس لما يبقي النجاح دخ يفرحه فعلا مش اشتغاله او منظر بس او فيه الفايدة بس للخاصة.

شعب زى ده سهل حكمه وسهل جدا ارضاءه ... بس مش سهل ابدا الحصول طول الوقت على دعمه ومساندته ..

هو اتعود ياخد حقه بنفسه ... مش بثورة ولكن بابسط الطرق الممكنة ... وممكن يلجأ للبلطجة، ده اللى شايفه بينفع فى بلدنا على اعلى وادنى مستوى.

وكل ما يلمس حق من حقوقه بيطمع فى المزيد ... وده اللى مافهمتوش كل النظم السابقة والحالية ..

وعلشان كده النظم دى هى اللى بتزول ... ويفضل الشعب المصرى دايما قاعد بيضحك عليها بخفة دم لا نظير لها.

#يحيا_المصريين

#العيب_من_النظام

#العلم_هو_الحل

فادى رمزى