ف قهاوى مصر

كتب بواسطة: فادى رمزى في . القسم ادب

 

 

ف قهاوى مصر شفت العجب

شفت الأصالة، شفت الأدب

فيها الحركة فيها العَطب

مع جو غاية فى الطرب

 

قهوة فاتحة من فجر يومنا

تنعش حزين وخايب الرجا

تبهج شوارع بصوت معلقة

وتفرش للحكمة مصطبة

 

 

شفت اللى على حالة انتحب

وواساه غريب فحاله اتقلب

 

ف قهاوى مصر شفت العجب

شفت الأصالة شفت الأدب

 

شفت كشرى وسلوم وقص

وماحدش ماسك لغيره مقص

شفت اللى شد وقال بالنَص:

خللوا الأحبة تيجى تترص

 

شفت عزيز للقهوة انجذب

اداها عينه لما انطلب

 

ف قهاوى مصر شفت العجب

شفت الأصالة شفت الأدب

 

شفت اللى قال انا راسمالى

اصلى ودينى وكل تراثى

واشتراكى ف القعدة أمانى

والحل ف عقلى مش ف ودانى

 

شفت اللى وجعه قعاد الكنب

ونزل ولبد وقال ده وَجَب

 

 

ف قهاوى مصر شفت العجب

شفت الأصالة شفت الأدب

 

لا شفت بدوانى بياكل ودانى

وكأنه العَالم بامر دينى

ولا برّاوى عايز انعزالى

وكأن القهوة مش هى مكانى

 

شفت المفترى مهما رَهَب

عمره ما وقـّع قلب ف ركب

 

ف قهاوى مصر شفت العجب

شفت الأصالة شفت الأدب

 

شفت القلب لما يحن

ونخوة عمرها ما تضن

وخير نافر صعب يكن

مهما الناموس عض وزن

 

امشير يناير رمضان رجب

هو المكان بنفس العَتب

 

ف قهاوى مصر شفت العجب

شفت الأصالة شفت الأدب

 

شفت رد فهلوى على اللى عامللى فنجرى

قاله مش هبيع قرارى ولا اديك مفتاح كرارى

 

وعلى قولة ادى زبيبتى، رد عليه وهو بيهرى

بقى دى تبقى اصول؟ ابفَرك ثومة تسلمنى؟

 

شفت راجع بعد ما إنتخب

وقال ده سوقـك يا علم جَدَب

 

ف قهاوى مصر شفت العجب

شفت الأصالة شفت الأدب

 

بهية قهوة تنقى زبونها

ويوم ما ترضى بتسقى خيرها

واللى ييجى يقبل أصولها

مش يبقى جاى يبدل لونها

 

بهية حالها عمره ما ينقلب

ولو عشقها ذنب، فالجنة لمن ارتكب

 

 

ف قهاوى مصر شفت العجب

شفت الأصالة شفت الأدب

 

فادى رمزى